Litteræ H., prioris Wenelokii, ad abbatem Cluniacensem, quibus se excusat de absentia sua a capitulo generali.
Reverentissimo patri in Christo domino abbati et diffinitoribus capituli generalis, frater H., humilis prior de Wenelokio, salutem et obedientiam cum omni subjectione debitam et devotam. Dominationi vestræ supplicandum duximus humiliter et devote, quatinus absentiam nostram in hoc instanti capitulo habere dignemini excusatam, cum vestris et nostris inevitabilibus et arduis negociis, quæ non esset tutum inscribere, occupati teneamur non mediocriter et implexi. Quæ quidem negocia venerabilis et dilectus noster A., prior Norhamptoniæ, vobis tangere poterit ut in parte. Datum apud Bermundeseiam, die dominica in Ramis Palmarum, anno Domini Mo CCo quadragesimo IIIIo.